Новы год пад знакам «Народнага альбому»

Тэлеканал «Белсат» падрыхтаваў навагодні падарунак для тых, каму даспадобы «Народны альбом».

У ноч з 31 сьнежня на 1 студзеня на тэлеканале «Белсат» адбудзецца прэм’ера фільму Сяргея Будкіна і Яўгена Шапчыца «Ненаўмысны шэдэўр» і тэлевэрсія канцэрту «Народны альбом. 20 год», паведамляе tuzin.fm.

Тэлеканал «Белсат» падрыхтаваў навагодні падарунак для тых, каму даспадобы «Народны альбом». У ноч з 31 сьнежня на 1 студзеня ў белсатаўскім этэры будуць па чарзе паказаныя фільм пад працоўнай назвай «Ненаўмысны шэдэўр», прагучаць віншаваньні з Новым 2017-м ад удзельнікаў праекту, а таксама будзе паказаная тэлевэрсія канцэрту «Народны альбом. 20 год», які прайшоў у Беластоцкай опэры ўвосень.

Што да фільму пра «Народны альбом», то ягоныя аўтары Сяргей Будкін і Яўген Шапчыц абяцаюць цікавы аповед пра гісторыю стварэньня і посьпеху першага супольнага праекту зорак беларускай рок-сцэны. «Фільм вытканы з успамінаў, рэдкіх архіўных матэрыялаў і сучасных здымак. Мы запісалі 20 інтэрвію ўдзельнікаў «Народнага альбому», знайшлі прыблізна 15 гадзінаў эксклюзіўнага архіўнага відэа, здымкаў і аўдыёзапісаў, наведалі месцы дзеі песень ды адшукалі раней невядомыя цікавосткі, а таксама ўгаварылі Інкогніта ўпершыню праз 20 гадоў прасьпяваць «Надзеньку», — адзначаюць аўтары фільму.

У фільме бяруць удзел Лявон Вольскі, Міхал Анемпадыстаў, Кася Камоцкая, Анатоль Додзь, Вераніка Круглова, Зьміцер Вайцюшкевіч, Аляксандар Памідораў, Піт Паўлаў, Юрась Ляўкоў, Алезіс Дземідовіч ды іншыя ўдзельнікі знакавага праекту.