Новости БеларусиTelegram | VK | RSS-лента
Информационный портал Беларуси "МойBY" - только самые свежие и самые актуальные беларусские новости

Падтрымаць крычаўскіх міліцыянтаў

03.05.2017 общество
Падтрымаць крычаўскіх міліцыянтаў

Многія «дармаеды» таксама галасавалі ў свой час за Лукашэнку.

Крычаўскім міліцыянтам прыгразілі магчымай крымінальнай адказнасьцю. Магілёўскае абласное начальства МУС сумняваецца ў інфармацыі, зьмешчанай у іх лісьце на імя міністра ўнутраных спраў Ігара Шуневіча.

Аўтары звароту вінавацяць сваё крычаўскае міліцэйскае начальства ў махінацыях з прэміямі, свавольстве і зьняважлівых паводзінах адносна падначаленых.

Тым часам у камэнтарах на большасьці рэсурсаў, якія апублікавалі інфармацыю пра гэтай справе, чырвонай ніткай ідзе рэакцыя, маўляў, «так ім і трэба!». Бо «галасавалі за Лукашэнку», бо «міліцыянты служаць рэжыму».

Казаць крычаўскаму афіцэру міліцыі, які наважыўся на публічную крытыку свайго начальства, «так табе і трэба!», бо ён галасаваў за Лукашэнку, гэта тое самае, што ганьбіць «дармаедаў», якія цягам лютага-сакавіка выходзілі на плошчы беларускіх гарадоў. Многія «дармаеды» таксама галасавалі ў свой час за Лукашэнку.

Злараднічаць у сытуацыі што з міліцыянтамі, што з «дармаедамі» — гэта адрубаць сябе ад працэсу зьменаў, якія пачаліся ў грамадзтве з канцом сацыяльнай дамовы між Лукашэнкам і насельніцтвам: «Я вам гарантую сярэдні дабрабыт, вы — ня лезеце ў палітыку».

Крычаўскія міліцыянты такія самыя «дармаеды», хоць і не трапляюць пад дэкрэт нумар З. Дэкрэт гэта толькі вяршыня айсбэргу. Галоўная прычына незадаволенасьці — агульнае пагаршэньне ўзроўню жыцьця.

Яшчэ больш памылкова трымаць такую пазыцыю: Маўляў, наце вам, міліцыянты, за ўсе перасьледы, што чыніла і чыніць дзяржава адносна незадаволеных.

Міліцыя — гэта толькі інструмэнт дзяржавы, а ня нейкае асобнае саслоўе. У Беларусі вымалёўваецца іншае нефармальнае саслоўе.

Крычаўскі прэцэдэнт толькі ілюструе падзел грамадзтва на саслоўі «начальства» і «ўсе астатнія». У сыстэме МУС адбываюцца тыя самыя працэсы што паўсюль у краіне.

Вобразна кажучы, «дармаеды» цяпер — абсалютная большасьць грамадзянаў, бо большасьць залежыць ад дзяржавы, а не забясьпечвае сама сябе.

І шмат якія міліцыянты, і іх сваякі церпяць такія самыя складанасьці як і звычайныя грамадзяне. Тыя «героі» у форме, якіх мы бачым з дубінкамі на мітынгах, яны самая заўважная, але невялікая частка сыстэмы МУС.

Калі ты выступаеш за справядлівасьць, ты ня можаш адстойваць яе для нейкага грамадзкага сэгмэнту. Яна і для тых, хто галасаваў за цяперашнюю ўладу, і для тых, хто абслугоўваў яе трываласьць. А цяпер сам робіцца фактарам нетрываласьці.

Дый сам факт, што афіцэры райаддзелу міліцыі наважыліся на публічны крок пратэсту ў рэаліях аўтарытарнай сыстэмы, заслугоўвае павагі. За каго б яны ні галасавалі калісьці.

Новае грамадзтва і новая краіна будзе фармавацца супольна — усімі зацікаўленымі ў зьменах грамадзянамі.

Севярын Квяткоўскi, «Радыё Свабода»

Последние новости:
Популярные:
архив новостей


Вверх ↑
Новости Беларуси
© 2009 - 2024 Мой BY — Информационный портал Беларуси
Новости и события в Беларуси и мире.
Пресс-центр [email protected]