У Вільні ўшанавалі Слуцкіх Герояў

28 лістапада ў Вільні адзначылі 97-ыя ўгодкі Слуцкага паўстання.

Нагадаем, што Слуцкі збройны чын — спроба ўзброенай абароны незалежнасьці Беларусі ў раёне Слуцку ў лістападзе і снежні 1920 году. Асноўнай рухаючай сілай Слуцкага збройнага чыну сталася сялянства, якое супраціўлялася савецкай палітыцы ваеннага камунізму і падтрымлівала ідэю незалежнасьці Беларусі, абвешчанай 25 сакавіка 1918 году. Збройны чын узначалілі прадстаўнікі мясцовай інтэлігенцыі і шляхты, пiша westki.info.

Першы Беларускі З’езд Случчыны, скліканы ў лічбе 107 дэлегатаў, перад пачаткам паўстання заявіў: „Вітаем Раду Беларускай Народнай Рэспублікі і сведчым, што ўсе свае сілы аддадзім на адбудову Сваёй Бацькаўшчыны. З’езд катэгарычна пратэстуе супраць акупацыі родных зямель чужацкімі наездамі і супраць самазванай Савецкай улады, як урад Кнорына і іншыя, якія з’явіліся ў Беларусі. Бацькаўшчына наша зруйнавана чужынцамі, якія нішчаць яе і да гэтуль, і мы, аддаючы справе адбудованьня нашай Бацькаўшчыны ўсе нашы сілы і жыцьця, звяртаемся да ўсяго свету і Лігі Нацый аб дапамозе ў стварэнні нашай вайсковай сілы… Няхай жыве вольная, незалежная, дэмакратычная Беларуская Народная Рэспубліка ў яе этнаграфічных граніцах!“

Мерапрыемства арганізавалі Таварыства беларускай культуры ў Літве і Асацыяцыя "Крывія".

Нагадаем, напярэдадні быў падпісаны зварот Віленскага аддзялення Саюдзіса Літвы і Таварыства беларускай культуры ў Літве, які быў накіраваны ўладам Слуцкага раёна. У ім, упрыватнасці, скіравана просьба да ўладаў Слуцкага раёна: „З набліжэння 100 гадавіны паўстання (2020 г.) звяртаемся да Вас з прапановай належным чынам ушанаваць герояў паўстання, тых, хто ахвяраваў сваім жыццём, каб жыла вольная і незалежная Рэспубліка Беларусь. Мы прапаноўваем да юбілейнага году ў Слуцку паставіць помнік паўстанцам, у іх гонар назваць адну з вуліц горада. 2020-ы юбілейны год у Слуцку просім назваць Годам слуцкіх паўстанцаў.“