Таццяна Севярынец: Варта ў Курапатах працягнецца

Арышты пратэстуючых супраць забаўляльнай установы побач з мемарыялам не прывядуць да сканчэння вахты.

Сустаршыня Беларускай хрысціянскай дэмакратыі Павел Севярынец асуджаны судом Фрунзенскага райну Менску на 10 сутак адмінітрацыйнага арышту. Ён пакараны за правядзенне вахты каля рэстарану, які пачаў працу побач з мемарыялам ахвярам сталінскіх рэпрэсіяў Курапаты. Па словах маці палітыка Таццяны Севярынец, Павел вырашыў на суд не ісці, а пабыць з сям’ёй, таму што пасля арышту абаронцы Курапатаў Максіма Вінярскага было зразумела, што і яго адправяць за краты, паведамляе “Радыё Рацыя”.

– Сам ён нікуды не хадзіў, журналісты яму паведамілі па тэлефоне пра вырак 10 сутак. Паша сабраўся, што трэба дома парабіў і пайшоў з рэчамі на вуліцу. Там яго ўжо чакалі. Калі Белсат прыязджаў, яны ўжо яго папярэдзілі, што там сіні бусік ужо палюе. Паша выйшаў, яны падыйшлі, ціха, спакойна пагрузілі і павезлі яго на Акрэсціна.

Аднак, па словах Таццяны Севярынец, арышты пратэстуючых супраць забаўляльнай установы побач з мемарыялам не прывядуць да сканчэння вахты каля рэстарану. „Ёсць людзі прыстойныя, каму баліць, як і Паўлу. Таму гэтая варта працягнецца”, – запэўніла Таццяна Севярынец.