Информационный портал Беларуси "МойBY" - только самые свежие и самые актуальные белорусские новости

«Яшчэ гукнуцца кату Курапаты!..»

04.04.2019 культура
«Яшчэ гукнуцца кату Курапаты!..»

Уладзімер Някляеў напісаў верш пра Курапаты.

Паэт, былы кандыдат на прэзыдэнта, былы палітвязень Уладзімер Някляеў напісаў верш «Галгофа» з нагоды дэмантажу крыжоў у Курапатах і затрыманьняў актывістаў.

Ён падзяліўся ім на сваёй старонцы ў Фэйсбуку.

ГАЛГОФА

«На могілках у Курапатах... зносяцца незаконныя збудаваньні ў выглядзе крыжоў».

БелТА.

Ідзеш наперад — пазірай назад.

Былое стуль за будучыняй сочыць,

І калі ты яму зірнеш у вочы,

Убачыш там, як на Галгофу кат

Паперадзе сваёй ахвяры крочыць,

Або ідзе адразу ўсьлед за ёй...

О, Беларусь!.. Айчына!.. Што з табой?

Увесь свой шлях, свой час увесь, свой век

Ідзеш ты паміж дзьвюх крывавых рэк,

Напоўненых то Захадам, то Ўсходам,

І той, хто тут глуміўся над народам,

Цяпер яшчэ й над Богам чыніць зьдзек!..

Глянь на яго й жахніся, чалавек!

Ты чуеш стогны? Гэта Курапаты,

Дзе выварочваюць

крыжы з магілаў

каты!..

Так у вар’ятні вочы з-пад павек

Жахліва выварочваюць вар’яты.

Маліся! Бойся Бога, чалавек!

Як ні нявечыў час, ні рваў, ні сек,

Усё ж спазнала ў часе чалавецтва:

Страшней за ўсіх, якія ёсьць, калек,

Калецтва сэрца і душы калецтва!

Старонку гэту час не прагарне.

Хай нават летапісцы ўсе наняты,

Яшчэ гукнуцца кату Курапаты!..

Калі яго расплата абміне —

Дзяцей ягоных не міне расплата!

За сьвятатацтва, сатанінскі сьмех

На могілках, дзе стогн, дзе плач гаротны!..

Тут, на Галгофе,

Веха нашых вех.

Вялікі пост. Вялікдзень. Страшны грэх.

Сьмяротны грэх.

Як прыгавор сьмяротны.

4.04.2019, Берасьце.

Источник charter97.org

Вверх ↑
Новости Беларуси
© 2019 Мой BY — Информационный портал Беларуси
Новости и события в Беларуси и в мире.
Пресс-центр [email protected]