Новости БеларусиTelegram | VK | RSS-лента
Информационный портал Беларуси "МойBY" - только самые свежие и самые актуальные беларусские новости

Зьміцер Казлоў: Людзі пачынаюць адчуваць сябе народам

11.12.2020 политика
Зьміцер Казлоў: Людзі пачынаюць адчуваць сябе народам

Пра што піша зьняволены блогер Шэры кот.

Палітвязень Зьміцер Казлоў (блогер Шэры кот), якога трымаюць у менскім СІЗА-1 на вуліцы Валадарскага, перадаў, што ў ягонай справе «ўсё пакуль ціха, няма ніякага руху».

Пра гэта ён піша ў лісьце, які атрымала літаратарка Паліна Сьцепаненка, паведамляе «Радыё Свабода».

32-гадовы блогер з Барані Зьміцер Казлоў быў затрыманы 10 чэрвеня разам з актывістамі «Эўрапейскай Беларусі» Арцёмам Чарняком і Міхаілам Бандарэнкам. Яго асудзілі на 20 дзён арышту, пасьля адбыцьця якіх ён мусіў выйсьці на волю 30 чэрвеня. Аднак Зьмітра пакінулі за кратамі — ён стаў новым фігурантам справы паводле ч. 1 арт. 342 Крымінальнага кодэксу («Арганізацыя ці ўдзел у групавых дзеяньнях, якія груба парушаюць грамадзкі парадак»). Блогера з Акрэсьціна перавялі ў СІЗА-1 на вуліцы Валадарскага ў Менску.

У лісьце, які быў адпраўлены 28 лістапада і дайшоў 10 сьнежня, Зьміцер Казлоў шкадуе, што яму не ўдалося трапіць на фэстываль Уладзімера Караткевіча, «хоць вельмі хацеў бы».

«Сытуацыя ў краіне, гляджу, усё такая ж напружаная, паводле маіх зьвестак, ужо 144 палітвязьні, а ўсяго тыдзень таму быў 121, — піша Зьміцер Казлоў. — У маёй справе ўсё пакуль ціха, няма ніякіх рухаў».

Паліна Сьцепаненка сказала Свабодзе, што атрымала ад Зьмітра паштоўку і чатыры лісты.

«Няважна, чым усё скончыцца 9 жніўня, для мяне важна тое, што, знаходзячыся на свабодзе, зрабіў усё, што было ў маіх сілах, каб абудзіць людзей ад сну розуму і адкрыць вочы на сацыяльна-палітычныя працэсы, якія адбываюцца ў краіне, — піша ў лістах блогер. — Прыемна бачыць, што людзі пачынаюць адчуваць сябе народам, а ня проста насельніцтвам нейкай безназоўнай тэрыторыі. Гэта не мае словы, гэта тое, што мне пішуць многія людзі».

Паліна Сьцепаненка пазнаёмілася з блогерам падчас выставы «Лісты палітвязняў ад 1996 году да нашых дзён» у 2018 годзе.

«Зьміцер — сірата, у яго нікога няма. Маці памерла паўтара года таму, а перад гэтым бацька. Працаваў ён у розных месцах, на ільнокамбінаце напрыклад, пасьля заняўся блогінгам. Харошы хлопец, вельмі шчыры. Быў кандыдатам у дэпутаты на мінулых выбарах у Палату прадстаўнікоў, — сказала актывістка. — Ён спачатку доўга сядзеў на „сутках“, яму далі 120 дзён за акцыі за незалежнасць».

Праваабаронцы «Вясны» кажуць, што пакуль няма ніякай інфармацыі пра Зьмітра Казлова.

«Блогераў ізалявалі. Я падазраю, што там і ніякіх сьледчых дзеяньняў не вядзецца. Іх усіх затрымалі паводле артыкула 342 і па гарадзенскіх падзеях, калі затрымалі Сяргея Ціханоўскага, незалежна ад таго, быў там нехта зь іх ці не, — кажа праваабаронца Валянцін Стэфановіч. — Гэта відавочныя адвольныя затрыманьні, яны думалі іх ізаляваць на пэрыяд выбарчай кампаніі, а потым паціху выпусьціць. А тут народ паўстаў, і вызваляць іх страшна, а час ідзе».

Последние новости:
Популярные:
архив новостей


Вверх ↑
Новости Беларуси
© 2009 - 2024 Мой BY — Информационный портал Беларуси
Новости и события в Беларуси и мире.
Пресс-центр [email protected]