Гурт :B:N: прэзентуе новы альбом «Крок за крокам»

Трэцяя пласцінка бярозаўскай каманды атрымала назву "Крок за крокам".

Пласцінка была гатовая да выдання яшчэ вясной, але хлопцы вырашылі перачакаць "мёртвы" летні сезон. У выніку ў альбом увойдуць 14 кампазіцый плюс бонус-трэк – кавер на песню "Песняроў" "Чырвоная ружа". Да таго ж у альбом увайшла песня-дуэт, якая мае назву "Нас няма" і запісаная разам з Кацярынай Муратавай, з якой музыкі знаёмыя з часоў вучобы ва Універсітэце культуры, паведамляе "Еўрарадыё".

"Альбом зноўку атрымаўся пра каханне! — смяецца франтмэн гурта Алесь Лютыч. — Як жартуюць нашы сябры з IQ-48, што гурт :B:N: грае ў стылістыцы "баба-рок". Але ўсё ж альбом не толькі пра каханне да дзяўчыны, але і пра каханне да Радзімы, і да добрага адпачынку і да іншага".  

Што тычыцца гучання альбома, тут :B:N: засталіся вернымі сабе. Як распавядае Алесь Лютыч, некаторыя песні будуць значна лягчэйшымі, чым на папярэдніх пласцінках, некаторыя наадварот — больш цяжкімі. Да напісання тэкстаў, за якія звычайна быў адказны Сяргей Машковіч, гэтым разам далучыліся Яўген Бузоўскі з IQ-48 ды бас-гітарыст :B:N: Аляксандр Зайцаў. Запісаць альбом :B:N: вырашылі на прыватнай студыі свайго сябра ў Мінску.

Прэзентацыя "Крок за крокам" адбудзецца ў клубе Re:Public 10 кастрычніка пры ўдзеле гурта Pananieba. :B:N: абяцаюць сыграць усё самае новае і выбранае з ужо вядомага:

"У нас будзе вялікі сэт з 32 песень — увесь новы альбом ды нашы старыя хіты. Плануем адыграць гадзінкі 2,5 не менш! Думаю, прыхільнікам нашай творчасці павінна спадабацца, бо нарэшце яны змогуць пачуць нажыва песні, якія мы ўжо шмат гадоў не гралі".

Даведкі: 029-6490888, 033-3091137