Рвецца Пагоня з дзяржаўнай пячаткі

Беларусы адзначаюць свята заканадаўчага афармлення беларускай незалежнасці.

Вядомы беларускi паэт i з адзін з лідараў Беларускага Нацыянальнага Кангрэсу Уладзімір Някляеў павiншаваў беларусаў з 26-ю гадавiнай заканадаўчага афармлення беларускай незалежнасці:

* * *

Што затужылі,
воі, мужчыны?
Волі ўдыхнулі — і дух заняло?
Як там і што там ні стане з Айчынай —
Горай не будзе, бо лепш не было.

Шлях свой зблукала Айчына ў трох соснах,
Збегала шлях чаўнаком, нібы ў кроснах,
Кідаючы невідушчы народ
З пасткі на захадзе ў пастку на ўсход.

Можа, відушчымі стануць нашчадкі?

Шляху няма. Ні канца, ні пачатку.
Прывідам — у пустату з пустаты —
Рвецца Пагоня з дзяржаўнай пячаткі,
Непадкаваныя б’е капыты.