Новости БеларусиTelegram | VK | RSS-лента
Информационный портал Беларуси "МойBY" - только самые свежие и самые актуальные беларусские новости

На Беласточчыне адбудзецца фестываль Абуджаных «Тутака»

19.07.2021 культура
На Беласточчыне адбудзецца фестываль Абуджаных «Тутака»

Фестываль адбудзецца на месцы былога «Басовішча».

На лясной палянцы Борык ля мястэчка Гарадок на Беласточчыне 6 і 7 жніўня пройдзе фестываль Абуджаных «Тутака». Звяртаючыся да спадчыны слыннага «Басовішча», новая культурная падзея — «праява салідарнасці з беларускім народам, які змагаецца за свабоду», піша wyborcza.pl.

Арганізатарам новага фестывалю з’яўляецца падляшскі фонд Тутака, які летась спрычыніўся да канцэрту салідарнасці «Сэрцам з Беларуссю» ды сёлета — да мерапрыемстваў Міжнароднага тыдня беларускай культуры. Мэта арганізацыі — папулярызацыя беларускай культуры і падтрыманне польска-беларускіх кантактаў, звяртанне да спадчыны Вялікага Княства Літоўскага.

А таксама арганізатары, кажучы пра новы фестываль, звяртаюцца да спадчыны слыннага фэсту беларускай рок-музыкі «Басовішча», які ладзіўся ля мястэчка Гарадок на Беласточчыне з 1990-га году. Гэты досвед абуджэння «духу свабоды», па іх меркаванню, быў неацэнны.

— 30 гадоў таму «Басы» абудзілі беларусаў Падляшша з гонарам гаварыць пра сваю ідэнтычнасць і выказваць яе праз сучасную музыку і бел-чырвона-белыя колеры свабоднай Беларусі, — цытуюць словы фонду wyborcza.pl.

— Падзеі мінулага года ў Беларусі, а таксама пастаянная барацьба яе грамадзян за ўласную свабоду і годнасць, тым больш апраўдваюць неабходнасць такога фестывалю, — падкрэслівае прадстаўнік фонду Павел Станкевіч, звяртаючыся ўжо да сучаснасці. — Мы хочам яшчэ раз паказаць, што падтрымліваем выбар беларусаў і беларусак, іх жаданне жыць у свабоднай дзяржаве.

— Мы запрашаем да ўдзелу ў фестывалі арганізацыі беларускай меншасці, якія дзейнічаюць у Польшчы. Кожны з іх уносіць бачны ўклад у развіццё культуры нашага рэгіёну, у агульную беларускую культуру, узбагачаючы тым самым польскую культуру, — заклікае Павел Станкевіч.

Падзея гэтаксама мусіць стаць нагодай «адзначыць гадавіну выбуху беларускай сацыяльнай рэвалюцыі».

«Гэта будзе і гадавіна фарміравання вялікай нацыі», — выказалі свае стаўленне да працэсаў у Беларусі арганізатары фестывалю.

Склад удзельнікаў фэсту пакуль удакладняецца.

Последние новости:
Популярные:
архив новостей


Вверх ↑
Новости Беларуси
© 2009 - 2024 Мой BY — Информационный портал Беларуси
Новости и события в Беларуси и мире.
Пресс-центр [email protected]