Папа Францішак падтрымаў грамаду вернікаў менскага Чырвонага касьцёла

Касцёл у вернікаў забралі ўлады.

Папа Рымскі Францішак асабіста праінфармаваны аб сытуацыі вакол касьцёла Сьвятых Сымона і Алены (Чырвонага касьцёла) у Менску, гаворыцца ў лісьце Дзяржсакратарыяту Ватыкану прадстаўнікам грамады храма.

Кіраўнік Сьвятога прастола ў пасланьні адзначыў, што лічыць важным мець магчымасьць свабодна вызнаваць веру ў любым месцы, паведамляе ініцыятыва «Хрысьціянская візія».

«Папа Францішак трымае вас і ваш прыход у Менску ў сваіх малітвах і запэўнівае вас у сваёй асаблівай духоўнай блізкасьці. Ён просіць вас маліцца за яго апостальскае служэньне і сам ад усяго сэрца моліцца аб шчодрых Божых дабраславеньнях за ўсіх вас і вашых блізкіх», — адзначана ў лісьце, які маюць актывісты.

Пасьля прэзыдэнцкіх выбараў 2020 году адносіны дзяржавы і касьцёла ў Беларусі ўскладніліся ў сувязі з тым, што многія каталіцкія ярархі і вернікі адкрыта выступілі супраць хвалі гвалту і рэпрэсій, якія наступілі ўсьлед за масавымі пратэстамі. Некаторыя сьвятары прайшлі праз затрыманьні, суды і арышты з палітычных матываў, асобныя былі вымушаныя пакінуць Беларусь.