«Чакай мяне»: у новым кліпе Лявона Вольскага зняліся 33 палітвязні

Рэліз альбому адбудзецца ў бліжэйшы час.

Гурт VOLSKI прэзентаваў кліп на песню з новага альбому «Лісты палітвязням». У запісе відэа да кампазіцыі «Чакай мяне» прынялі ўдзел 33 беларуса, якія сталі ахвярамі палітычных рэпрэсій. Рэліз альбому адбудзецца ў бліжэйшы час.

Кліп дасяжны на YouTube-канале Лявона Вольскага.

Сярод яго герояў — праваабаронца Леанід Судаленка, журналіст Алег Груздзіловіч, актывіст грамадзянскай кампаніі «Еўрапейская Беларусь» Андрэй Шарэнда ды іншыя. У спісе герояў кліпа разам з імёнамі палітвязняў даецца інфармацыя пра суддзяў, якія вынеслі злачынныя прысуды.

«Чакай мяне, чакай мяне — і я вярнуся.

Чакай мяне, калі туга цераз край.

Чакай мяне ў радасці, стоме і скрусе.

Чакай мяне, галоўнае — вельмі чакай…» — звяртаюцца палітвязні да гледачоў відэа.

Кампазиция «Чакай мяне» мае прысвячэнне ўсім палітзняволеным Беларусі.

«Кожнаму зьняволенаму вельмі хочацца, каб яго чакалі, каб на яго не забываліся, каб пра яго думалі — штодзень, штогадзіну, штохвіліну. І, калі вельмі чакаць, дык абавязкова дачакаешся. У кліпе песьню сьпяваюць былыя палітвязьні — тыя, хто прайшоў усе колы пекла беларускіх вязьніцаў», – кажа ў інтро да кліпу Лявон Вольскі .

Працу над альбомам «Лісты палітвязням», выхад якога чакаецца бліжэйшым часам, гурт VOLSKI абвесціў у верасні 2023 года разам з пачаткам аднайменнага грамадска-палітычнага праекту, сумеснага з ініцыятывамі Палітвязынка і Дэсыдэнтбай. Каманда прапануе шэраг відэа пра з’яву палітвязынства, сабраных у плэй-лісце на Youtube.